VIDEO: Óli spældi sín lívs dyst

 - Karakterstigin røkkur vanliga bert upp í fimm, men í dag velji eg at geva eitt + omaná.

Soleiðis skrivaði viðmerkjarin hjá Kringvarpinum, Ingi Olsen, um Óla Mittún, tá hann metti um avrikini hjá føroysku spælarunum í søguliga 37-24 sigrinum á Montenegro í gjár. 

Hann var snøgt sagt bergtikin av avrikinum hjá fótfima bakkinum, sum mundi spæla sín lívs dyst frammanfyri teimum túsundtals føroyingunum í Unity-leikhøllini í Oslo. 

LES EISINI: Ingi Olsen metir um spælaraavrikini móti Montenegro

Ei undur í; Óli Mittún var ógjørligur at steðga hjá risunum í montonegrinsku verjuni. Hjálptur av góðum álopsvariantum og 'screeningum' frá vælspælandi strikunum, fór hann ferð eftir ferð ígjøgnum, og úrslitið var hitt sama hvørja ferð. Mál til Føroyar.

Framúr avrik á øllum plássum

Venjarin Peter Bredsdorff-Larsen hevur undan endaspælinum lagt stóran dent á, at Føroyar skuldu spæla á EM-stigi. Danin fór ivaleyst væl nøgdur til songar í gjár, tí spælararnir góðu honum framúr avrik á øllum plássum.

Evropeiska hondbóltssambandið valdi føroyska málverjan Paula Jacobsen til dagsins spælara. Tað var eisini væl skilligt. Nógv liggur á herðunum hjá liðskiparanum, og hann livdi so ruddiliga upp til krøvini ímóti Montenegro. Bjargar 16 av 37 skotroyndum, og tað gevur honum 44 í bjargingarprosenti.

Fleiri av bjargingunum vóru ódramatiskar og í góðum samstarvi við framúr góðu verjuna, meðan aðrar vóru beinleiðis stórbjargingar. Ein av hesum slagnum er næstbesta bjargingin í 4. dystardegi, heldur í hvussu er EHF.

Føroysku spælararnir forkelaðu eisini fjeppararnar við fleiri góðum málum. Einki betri enn tá Elias Ellefsen á Skipagøtu fekk bóltin við fáum sekundum eftir at klokkuni og høgdi hann upp í hornið úr eini 11 metrum. Um fólk framvegis leitaðu eftir tekini upp á, at økslin hevur tað gott, fingu tey tað har.

Skotið hjá Eliasi Ellefsen á Skipagøtu var somikið gott, at EHF hevur valt tað til hitt besta á fjórða dystardegi.