Trump um hóttanir: Iran verður týnt

Iran verður "týnt av jørðini", um tað nakrantíð drepur amerikanska forsetan, sigur Donald Trump.

- Eg havi sera nágreiniligar leiðbeiningar. Um nakað hendir, so verður Iran strikað av jørðini, sigur Trump í samrøðu við News Nation, tá ið hann verður spurdur um hóttanir hjá Iran móti sær. 

Iranski generalurin Abol-fazl She-karchi segði í gjár, at Iran fer ikki at aftra seg, um landsins hægsti leiðari, Ali Khamenei, verður dripin.

- Trump veit, at um ágangshondin verður lyft móti okkara leiðara, so fara vit ikki bara at skera ta hondina av. Vit fara at seta eld á heimin hjá teimum, og har verður einki friðskjól at krúpa í í økinum, er Abol-fazl She-karchi endurgivin fyri at siga í almennum iranskum miðlum.

Kravgongur

Nakrar av størstu mótmælisgongunum síðani islamsku kollveltingina í 1979 hava í meira enn tvær vikur verið móti stýrinum í Iran. 

Tíðindastovan Human Rights Activists (HRANA) í USA sigur, at 4.519 mótmælisfólk hava latið lív, og at umstøðurnar kring meira enn 9.000 onnur deyðsføll verða kannaðar. 

4.251 av teimum dripnu vóru mótmælisfólk og 197 limir í trygdardeildunum, vísa tølini hjá HRANA.

Sunnudagin segði ein leiðandi iranskur embætismaður við Reuters-tíðindastovuna, at meira enn 5.000 fólk, av teimum 500 limir í trygdardeildunum, eru deyð í sambandi við mótmælini.