Felags lønarkarmur fyri 12 fakfeløg undirskrivaður

12 fakfeløg á almenna arbeiðsmarknaðinum undirskrivaðu avtalu, sum setir ein felags lønarkarm frá 1. oktober 2025 til 30. september 2026 - við einum lønarvøkstri upp á 3,87 prosent. 
Karmurin er roknaður út frá miðal vøkstri í framleiðslumegi seinastu fimm árini og prísvøkstri tey seinastu trý árini. 

Hetta merkir, at almenni arbeiðsmarknaðurin nú beinleiðis verður knýttur at gongdini í búskapinum.

Ruth Vang, landsstýriskvinna í fíggjarmálum, sigur, at endamálið er at skapa ein haldføran leist, har realur lønarvøkstur og búskaparlig ábyrgd ganga hond í hond.

Formaðurin í Starvsfelagnum, Súni Selfoss, leggur dent á, at hetta er fyrstu ferð, at so nógv fakfeløg standa saman um ein felags lønarkarm. Fyri framman standa nú sáttmálasamráðingar, har tey 12 fakfeløgini hvør sær skulu samráðast um sín egna sáttmála - innanfyri teir karmar, sum semja nú er um.

Eitt av fakfeløgunum, sum skrivaði undir avtaluna í dag, er Búskapar- og Løgfrøðingafelag Føroya. Felagið heldur, at karmurin gevur tryggleika og er vegurin fram fyri framtíðar samráðingar.

Fíggjarmálaráðið sigur, at endamálið við avtaluni er at røkka einum støðugum og burðardyggum lønarvøkstri.

Hesi fakfeløgini eru við í avtaluni um felags lønarkarm: 

·       Starvsfelagið
·       Akademikarafelag Føroya
·       Búskapar- og Løgfrøðingafelag Føroya
·       Yrkisfelagið Miðnám
·       Farmakonomar
·       Kost- og Føðslufelagið
·       Yngri læknar Føroyar
·       Heilsurøktarafelagið
·       Føroyskir Fysioterapeutar
·       Føroya Tekniska Lærarafelag
·       Ljósmøðrafelag Føroya
·       Pharma Danmark

Les avtaluna um felags lønarkarm her.