Danmark letur Ukraina 190 milliónir í humaniterari hjálp

Danmark sendir Ukraina góðar 190 milliónir krónur í humaniterum stuðli.

Tað boðar danska uttanríkisráðið frá.

Í fráboðanini kallar Lars Løkke Rasmussen, uttanríkisráðharri, verandi støðu í Ukraina fyri hjartanemandi.

- Beint nú uppliva ukrainarar ein ógvuliga kaldan vetur, og Putin ger sær kyniskt dælt av kuldanum til sín taktiska fyrimun, við at fremja skipað álop á undirstøðukervið og sivila veiting, sigur Lars Løkke Rasmussen

Við nýggja stuðlinum hevur Danmark tilsamans veitt umleið 1,3 milliardir krónur í humaniterari hjálp, síðan kríggið brast á.

Stórur tørvur á hjálp

Sambært ráðharranum fyri trygd og tilbúgving, Torsten Schack Pedersen, er stórur tørvur á hjálp.

- Alt ov nógv ukrainsk sivilfólk líða sum avleiðing av russisku álopunum, sum nú hava verið í fýra ár. Eg havi júst verið í Ukraina og havi sæð, at talan er um bráðfeingis tørv, sigur hann.

Stuðulspakkin fer til bjargingarútgerð og útbúgving innan ukrainsku tilbúgvingina.