Føroya Symfoniorkestur spælir várkonsert í Norðurlandahúsinum og í Varpinum

Á várkonsertini framførir Aksel Remmel klaverkonsert nr. 2 eftir Sergej Rachmaninov. 

Konsertirnar eru í Norðurlandahúsinum og í Varpinum ávikavist 14. og 15. mars.

Harumframt framførir symfoniorkestrið verkið ”Let me cry” eftir tónaskaldið Eli Tausen á Lava. Eli hevur seinastu árini vunnið sær sæti á altjóða tónleikapallinum.

Undanprát

Stutt undanprát verður kl. 18.50.

Her fara dirigentur og tónaskald at tosa um verkini. Og hvør veit, kanska verður eisini onkur skemtisøga á skrá.

Altjóða gjøgnumbrot

Eli Tausen á Lava er virkin sum tónaskald, pianistur og elektroniskur tónleikari. Hann hevur masterútbúgving í tónasmíði frá New York University og hevur samstarvað við m.a. BBC Scottish Symphony Orchestra og Helsingborgs Symfoniorkester.

Orkesturverkið "Let me cry" var frumframført á Nordic Music Days í Skotlandi í 2024 og var eitt týdningarmikið gjøgnumbrot. Síðani hava fleiri evropeisk orkestur sett verkið á skránna.

Aksel Remmel 

Aksel Remmel tók í 2025 masterútbúgving á Kongaliga Danska Musikkonservatoriinum í Keypmannahavn hjá professor Jens Elvekjær. Hann vann í 2021 tónleikakappingina Stella Polaris fyri ungar klassiskar tónleikarar og hevur áður framført við Føroya Symfoniorkestri.

Á várkonsertini spælir Aksel fyri fyrstu ferð eina heila klaverkonsert við orkestri. Klaverkonsert nr. 2 eftir Sergej Rachmaninov er eitt av kendastu og mest virtuosu klaververkum.

aksel_remmel.jpg

Tjajkovskijs 4. symfoni

Á skránni er eisini 4. symfoni eftir Tjajkovskij. Verkið er skrivað í árunum 1877–1878. Verkið snýr seg um lagnu – fatum – og speglar persónliga kreppu hjá tónaskaldinum í einum sterkum dramatiskum tónalagi. Í dag verður symfoniin roknað sum hin týdningarmiklasta eftir Tjajkovskij og verður framførd kring allan heim.

Dirigentur við altjóða royndum

Nýggi dirigenturin hjá Føroya Symfoniorkestri, Catherine Larsen-Maguire, stjórnar orkestrinum. Catherine er fødd í Manchester og býr í Berlin. Eftir tíggju ár sum solofagottistur í Komische Oper Berlin valdi hon í 2012 at fylgja dirigentdreyminum. Hon hevur m.a. stjórnað orkestrum sum London Philharmonic, BBC National Orchestra of Wales og Berliner Radiosymfoniorkestri.

catherine_larsen_maguire.jpg