Tøgn tegir ikki: "Sig mær" eitur nýtt staklag hjá føroyska dreingjabólkinum

Tøgn hevur sett seg tung á føroysku dreingjabólka-trónuna. Tað var kanska ikki so trupult, tí tað er øgiliga langt millum føroysku dreingjabólkarnar. 

Men tað byrjaði við útgávuni av fyrsta staklagnum Kamarið", ið gjørdist eitt risahitt, sum eisini var kosið Ársins útvarpshitt av lurtarum Kringvarpsins.

Sterka byrjanin við "Kamarið" verður nú fylgt upp við útgávuni av staklagnum "Sig mær". Enn einaferð er talan um popptónleik á altjóða støði á føroyskum. 

Tríggir eru blivnir til fýra

Nakað er tó broytt síðani útgávuna av "Kamarið". Tríggir eru blivnir til fýra, tí Tøgn hevur fingið ein níggjan lim, Filip Zachariassen. 

Sostatt eru teir, ið manna bólkin: Bárður Petersen, Beinir Troest Rasmussen, Filip Zachariassen og Jónas Gaard.

Um hugt verður eftir fyrimyndirnar innan altjóða dreingjabólkar, so er fýra nokk eitt betri tal í tráð við The Beatles, hóast fimm limir er tað mest vanliga í dreingjabólkum. Take That, Westlife, Backstreet Boys, One Direction, NSync og New Kids On The Block høvdu øll fimm limir. 

Leingjast heim

Felags fyri allar limirnar í Tøgn er, at teir eru útiseta. Hetta er eisini tað, sum nýggi sangurin, "Sig mær", snýr seg um - at leingjast heim til Føroyar.

Allir limirnir í bólkinum hava verið við til at skrivað og framleitt "Sig mær", meðan tað er The Grand Old Man innan føroyska tónleikaframleiðslu, Óli Poulsen, ið hevur ljóðblandað og mastrað. 

Tøgn