Anna skavaði sigurin um linjuna í evstu løtu

Júst tá tað sá út til, at dysturin millum Føroyar og Georgia fór at enda málleysur, eydnaðist tað heimaliðnum at avgera.

Í síðsta minutti var ein bóltur spældur úr verjuni til føroyska framherja, sum fekk beint hann út aftur í venstru síðu. Innleggið fór ímóti handaru stongini, málverjin fekk hondina á, men tá bólturin kom niðurat fekk Anna Brændstrup skava hann inn um mállinjuna, og Føroyar var á sigurskós.

Ikki tí, føroyingarnir máttu stríðast í seks minuttir afturat, og tað stóð á ímóti endanum, men tað gekk, og bæði spælarar, venjarar og viðhaldsfólk kundu fegnast um trý uppiborðin stig.

Vóru favorittar

Føroyar vóru smáir favorittar ímóti Georgia, sum hevði tapt 4-0 fyri Grikkalandi, og er niðanfyri føroysku kvinnurnar á styrkislistanum, og tað sást eisini á vøllinum.

Føroysku spælararnir høvdu betri tíð og valdu nógv oftari røttu loysnina enn ímóti Grikkalandi týskvøldið, men kortini gekk ikki meir enn næstbest at spæla seg til stórar kjansir. Ásla Johannesen var nær við eftir horna, og Fridrikka Clementsen eftir gott kontra, men støðan í hálvleikinum var 0-0.

Satsaðu og vunnu

Gongdin var nøkulunda hin sama eftir steðgin - kanska Georgia høtti eitt sindur meir viðhvørt - og so líðandi óttaðust føroysku viðhaldsfólkini fyri, at tey máttu fara av Tórsvølli uttan eitt føroyskt mál.

Síðstu løtuna settu Føroyar í hægri gir. Álopssinnaðir miðvallarar komu inn fyri miðverjar, og heimaliðið fekk deyðbólt eftir deyðbólt. 

Tað gav eisini úrslit. Innskifta Anna Brændstrup stóð á rætta stað og tryggjaðu Føroyum ein góðan heimasigur.

Tórsvøllur (HM-undankapping, 3. umfar)

Føroyar - Georgia, 1-0 (0-0)

1-0 Anna Brændstrup, 90 min.