Iran um uppskotið: Gávumilt og lógligt

Uppskotið hjá Iran um eina avtalu, sum skal enda kríggið við USA og lata Hormuzsundið uppaftur, er "gávumilt" og "lógligt", segði talsmaðurin hjá iranska uttanríkisráðnum, Esmaeil Baghaei, í dag, sambært Reuters. 

Hann segði, at USA framvegis heldur fast um tað, sum hann kallar órímilig og einvís krøv móti Iran. 

- Okkara krav er lógligt: at krevja, at kríggið endar, at strika amerikonsku blokaduna og amerikanska sjórænaravirksemið, og at sleppa iranskum peningi, sum órættvíst hevur verið frystur í bankunum orsakað av trýsti frá amerikanarum, sigur Baghaei. 

Hann segði, at Iran eisini hevur kravt trygga skipaferðslu í Hormuzsundinum og frið í økinum, eisini í krígsherjaða Libanon. 

Amerikanski forsetin, Donald Trump, segðií gjárkvøldið, at hann heldur, at iranska uppskotið til amerikanararnar var "KANN ALS IKKI GÓÐTAKAST", uttan at fara í smálutir.