Hákun: Stórur munur á fyrra og seinna hálvleiki

 - Broytingin var stór frá fyrra til seinna hálvleik.

Tað segði Hákun West av Teigum eftir sigurin á Bosnia Hersegovina, sum sendi føroysku menninar til eitt HM-endaspæl fyri fyrstu ferð.

 - Tað snúði seg ikki so nógv um, hvussu Bosnia spældi, men meir um, hvussu vit sjálvir spældu og hugburð og kroppsmál, segði vongurin, sum við sínum 11 málum tók metið fyri flest mál á føroyska manslandsliðnum frá Hanusi Joensen.

Tað var kortini eingin ivi í huganum hjá stjørnuveinginum úr Berlin, hvat hann setti hægri, HM-plássið ella nýsetta metið.

 - Nei, tað fyrsta. At koma til eitt HM-endaspæl. Eg fari sjálvandi at feira tað við eini leskiligari Clickhaze seinni, men hitt er stuttligt, og eg eri errin av at vera mest skorandi higartil. So er spurningurin, um Elias ætlar at elta meg, smíltist Hákun West av Teigum.

Í steðginum var 17-15 til útiliðið og javnt samanlagt, men í seinna hálvleiki sást mestsum beinanvegin, at føroyska verjan hevði sett í eitt hægri gir. Tað hjálpti eisini í álopinum, sum treivst alsamt betri út á dystin.

Vongurin frøddist um, at tað nú var eydnast at mana HM-spøkilsi frá Norðurmakedónia í jørðina.

 - Vit eru nógv meira búnir sum spælarar. Tá eg hyggi aftur, var eg øgiliga ungur, og Óli, Elias, Vilhelm, vit hava allir bart okkum upp eftir og spæla í feløgum uttanlands, so hetta er eitt nógv búnari lið, og eg vænti, at tað fer bara at blíva betri, segði Hákun West av Teigum.