Portugisi verður venjari í Havnar Svimjifelag

Nevndin í Havnar Svimjifelag hevur gjørt sáttamála við Rui Magalhaes, boðar svimjifelagið frá í tíðindaskrivi. Portugisiski venjarin var tøkur á marknaðinum, eftir at hava vant portugisiska svimjilandsliðið seinastu seks árini.

Umframt landsliðsroyndir hevur nýggi venjarin royndir sum høvuðsvenjari í svimjifelagi í Lissabon í 16 ár.

Nýggi venjarin hevur longu havt møguleikan at vitja og eygleiða 15 kappsvimjarar hjá Havnar Svimjifelag, sum í seinastu viku vóru á venjingarlegu í Reykjavík. Rui Magalhaes byrjar í starvinum 1. februar.