- Tíðindi, mentan og ítróttur
Fyrstu skotini latin av í Ukraina
![](https://kvf.fo/sites/default/files/styles/grein-ovasta-mynd/public/russiskir_hermenn_a_krim-halvoynni.jpg?itok=b0QkGHZp)
Fyrstu ávaringarskotini eru latin av við herstøðina Belbek Air Base nærhendis Sevastopol á Krim.
Tað er ikki greitt, hvør hevur skotið.
Fyrst skrivaðu fleiri keldur á sosiala miðlinum Twitter - eitt nú Simon Shuster, journalistur á Time, at ukrainskir hermenn hava skotið 10 ávaringarskot móti russum, sum hava hertikið støðina.
CNN skrivar hinvegin, at tað eru russar, sum hava skotið 10 skot upp í loft fyri at ávara óvápnaðar ukrainskar hermenn, sum nærkast inngongdina til herstøðina.
Einki álop
Hóast tað ljóðaði í gjár, at russar høvdu hótt við at leypa á ukrainsku herdeildirnar á Krim-hálvoynni, um tær ikki løgdu vápnini áðrenn klokkan fýra í nátt, so er ongin fráboðan komin úr Krim um nakað russiskt álop, sambært tíðinastovunum Ritzau og Reuters. Ein kelda í ukrainska uttanríkisráðnum segði í gjár, at tað var russiski herflota-ovastin, Alexander Vitko, sum gav kravboðini, og ein tíðindatalsmaður fyri ukrainska verjumálaráðið váttaði fyri bretska BBC, at russar høvdu sett ukrainum hesi kravboðini.
Men seinni í gjár avsannaðu russiskir myndugleikarnir hesi tíðindini.
- Hatta er vrøvl, segði ein dulnevnd kelda í russiska svartahavs-herflotanum, sambært Interfax. Og nú í morgun er onki at hoyra um nakað álop á Krim, sambært Reuters og Ritzau.