Havnin bjóðar fólki arbeiði

Tórshavnar kommuna fer nú undir at bjóða út virknisvenjing, so fólk, sum leita eftir arbeiði, fáa møguleika at nýta sínar førleikar sum skjótast.

Virknisvenjingin er bæði fyri fólk, sum nýliga eru flutt til Føroya og enn ikki hava fingið starv og til fólk, sum eru dottin úr ALS-skipanini.

Kommunan ynskir at arbeiða fyri, at fólk betra møguleikarnar at fáa fast starv. Og tað ger kommunan við at bjóða fólki, sum eru uttan fyri arbeiðsmarknaðin, virknisvenjing.

Virknisvenjingin í Tórshavnar kommunu verður gjørd í samstarvi við Almannaverkið, sum hevur sett skipanina í verk.

Tey, sum ynskja virknisvenjing, fáa vanliga bjóðað arbeiðstilboð í tríggjar mánaðir, men tilboðið kann eisini verða skipað upp í 6 mánaðir í senn.

Tórshavnar kommuna byrjar at taka fólk inn beinanvegin, upplýsir kommunan í tíðindaskrivi.