Útlendsk manning skal hava arbeiðsloyvi í Føroyum

Vinnumálaráðið hevur biðið danska Løgmálaráðið broyta reglurnar í útlendingalógini, sum er galdandi í Føroyum, so allir útlendingar, sum eru við føroyskum fiskiskipum í føroyskum sjóøki, skulu hava arbeiðs- og uppihaldsloyvi í Føroyum. 

Útlendingamál eru ikki yvirtikin, so tí kann landsstýrið ikki fáa løgtingið at broyta útlendingalógina.

Útlendingastovan kannar

Johan Dahl, landsstýrismaður, sigur í svari til Gunvør Balle, løgtingskvinnu, at Útlendingastovan kannar, um lønar- og arbeiðstreytir eru sambært galdandi sáttmálum á føroyska arbeiðsmarknaðinum, tá umsóknir um arbeiðs- og uppihaldsloyvi koma frá útlendingum. Men Útlendingastovan veit einki um útlendingar, sum eru við føroyskum skipum uttan arbeiðs- og uppihaldsloyvi.  

Bara útlendingar við føroyskum fiskiførum, sum regluliga koma í føroyska havn, skulu hava uppihaldsloyvi. 

Tíggju ferðir um árið

Sum meginregla verður “regluliga” mett at vera í minsta lagi okkurt um tíggju ferðir um árið. Men meginreglan er ikki avgjørdari enn so, at metast skal um hetta í hvørjum einstøkum føri.

Johan Dahl sigur, at Vinnumálaráðið veit ikki, hvussu nógvir útlendingar eru við føroyskum fiskiskipum, og hvussu nógvir teirra hava hava uppihaldsloyvi.