Ísland: Misskiljing, at nógv nøvn verða vrakað

Nógv kjak hevur verið í Íslandi um íslendsku navnalóggávuna seinastu tíðina í samband við, at ein 15 ára gomla Blær Bjarkadóttir vildi hava navn sítt skrásett hjá íslendska fólkayvirlitinum. Hon hevur alt sítt lív itið "genta" Bjarkadóttir, tí navnið er ikki í samsvar við navnalóggávuna.

Og í farna mánaði var eitt líknandi mál, har ein 10 ára gomul genta ikki sleppur at eita Harriet. Málið kom fram, tí Harriet skuldi hava pass, men fekk tað ikki, tí myndugleikarnir útflýggja ikki pass til persónar, sum ikki hava góðkent navn.

Smidlig navnalóg

- Okkara ynski er, at flestu nøvn verða góðkend. Lógin er smidlig, og flestu nøvn verða eisini góðkend, og fá verða vrakað, sigur forkvinnan í íslendsku navnanenvdini, Ágústa Þorbergsdóttir, í samrøðu við Morgunblaðið.

Nevndin góðkendi herfyri fornøvnini Krumma, Gill, og Christa við C, og millumnavnið Eskfjørð. Hinvegin vann fornavnið Íshak ikki frama í navnanevndini og varð vrakað, tí tað fylgir ikki við íslendsku navnalóggávuna, skrivar Morgunblaðið.