Leiðandi ebola-yvirlækni deyður av sjúkuni

<p>39 ára gamli Sheik Umar Kahn, ið hevur viðgjørt fleiri enn 100 fólk í Sierre Leone í Vesturafrika fyri ebola-sjúkuna, doyði í gjár. Tað upplýsa heilsumyndugleikarnir, sambært tíðindastovuni AP.</p>

<p>Sheik Umar Kahn varð í seinastu viku innlagdur á eina viðgerðarstovu hjá Læknum uttan landamørk, har Umar Kahn sjálvur var í viðgerð fyri ebola-sjúkuna.</p>

<p>Frammanundan hevði afrikanski læknin staðið á odda fyri størstu viðgerðarstovuni í býnum Kenama, umleið 300 kilometrar frá høvuðsstaðnum í Sierra Leone, Freetown.</p>

<p><strong>Skýrdur tjóðarhetja</strong></p>

<p>Miatta Kargbo, heilsumálaráðharri í Sierra Leone, hevur skýrt Sheik Umar Kahn tjóðarhetju, og hevur róst honum fyri sín lut at basa ebola-sjúkuni og bjarga lívinum hjá fólki í Vesturafrika.</p>

<p>Sheik Umar Kahn, ið doyði av ebola-sjúkuni í gjár, týsdagin, varð smittaður av systur síni, sigur kona Sheik Umar Kahn í samrøðu við tíðindastovuna AP.</p>

<p>Tilsamans eru 662 fólk nú deyð av herviligu ebola-sjúkuni, síðan sjúkan tók seg upp í januar mánað í ár. Í Sierra Leone, har Sheik Umar Kahn starvaðist, hevur ebola-sjúkan higartil kravt 159 lív.</p>