Hvørki játtar ella noktar manndráp í Hvalba

Maðurin, sum er skuldsettur fyri manndráp, er varðhaldsfongslaður í fýra vikur, til 5.september

Sambært Føroya rætti er grundaður illgruni um, at hann hevur gjørt tað, hann er skuldsettur fyri.

Verjin kærir ikki úrskurðin hjá rættinum.

Ein  23 ára gamal maður í Hvalba er skuldsettur fyri at hava dripið ein 36 ára gamla Hjalmar Holm við trimum knívstungum í hálsin í gjáramorgunin.

Í grundlógaravhoyringini, sum var í Føroya rætti fyri afturlatnum hurðum, boðaði verjin hjá skuldsetta manninum, Christian Andreassen, frá, at skuldsetti tekur ikki støðu til skuldarspurningin enn.

Manndrápið, sum 23 ára gamli maðurin er skuldsettur fyri, hendi í einum sethúsum í Hvalba í gjáramorgunin.

Ein 39 ára gamal maður varð eisini tikin. Maðurin býr í húsunum, har sum hendingin  var. Báðir menninir vórðu tiknir, hvør á sínum stað, á middegi í gjár, trý korter eftir, at politiið fekk fráboðanina.

Men 39 ára gamli maðurin skuldi ikki í grundlógaravhoyring. Hann er latin leysur.