Giktafelagið vil hava loysn á læknatrupuleikanum

Giktafelagið heitir nú á myndugleikarnar um at fáa viðurskiftini um giktalæknan á Landssjúkrahúsinum í rættlag. 

Einasti giktlæknin í landinum hevur sagt seg úr starvi frá 1. januar, og hesum kann giktafelagið ikki liva við. 

Felagið krevur, at giktlæknin fær arbeiðsró og sømilig kor at virka undir, at sáttmálaviðurskiftini og arbeiðsvirðurskiftini eru í lagi. 

Í yvirlýsing vísir felagið til samgonguskjalið, har tað stendur, at "bíðilistarnir til serviðgerð skulu minkað".

Verandi giktlækni hevur megnað at stytt um bíðitíðina munandi, sigur felagið, sum ynskir, at giktlæknin heldur fram í starvinum. 

- Støðan er hættislig, sigur Giktafelagið. Í núverandi stund er bert ein giktlækni, og helst skuldu verið tveir ella tríggir, sigur felagið í yvirlýsingini. 

Í løtuni hava á leið 1500 sjúklingar tørv á giktviðgerð á Landssjúkrahúsinum.