Biðja um fleiri pengar til heilivág og tvíkiljur

Eisini meðan lógaruppskotið um eykajáttan er í løgtinginum kemur landsstýrið við fleiri umbønum um pengar til veranndi fíggjarár.

Heilsumálaráðið biður Fíggjarnevndina taka við í sítt álit hálva millión krónur afturat í ár til serstakan sjúkrahúsheilivág.

Talan er um bráðmál, sum Heilsumálaráðið sigur seg ikki hava vitað um, tá eykajáttanarlógin fór í løgtingið fyri einum mánað síðani.

Nýggjur og dýrur 

Talan er um nýggjan og sera kostnaðarmiklan heilivág, sum RADS, Rådet for Anvendelse af Dyr Sygehusmedicin, ikki hevur viðgjørt enn. 

Avvarðandi yvirlæknar meta, at viðgerðin fer at bøta munandi um útlitini fyri bata, og at viðgerðin skal vera í Føroyum, tí vit hava serfrøðina her. 

Heilivágsráðið tekur undir við yvirlæknunum, at talan er um serligt føri, og at stundir eru ikki at bíða eftir vegleiðing frá RADS í hesum føri.

Tríggir sáttmálar 

Og Vinnumálaráðið biður um góðar 370.000 kr. afturat til stuðul til skipasmíð, tí KJ Hydraulik hevur gjørt sáttmála um at byggja eina tvíkilju til útlendskan keypara. 

Stjórin á KJ Hydraulikki hevur kunnað Vinnumálaráðið um, at fleiri byggisáttmálar eru á veg, ein við keypara í Hetlandi í hesari vikuni og ein við føroyskan keypara í næstu viku.