Rættarnevndin: Sea Shepherd skal ikki inn í landið

Felagsskapir sum Sea Shepherd, ið hava ætlanir um ólógligt virksemi, skulu vendast í Kastrup ella á keiini. 

Uppskotið hjá Tjóðveldi, sum forðar felagsskapum sum Sea Shepherd at koma inn í landið ella at fáa útgerð við sær til Føroya, kemur til 2. viðgerð í løgtinginum í dag.

Ein samd rættarnevnd mælir løgtinginum til at samtykja uppskotið - tó við broytingum.

Rættarnevndin vil hava løgtingið at seta forboðið í gildi sum skjótast. Tí mælir rættarnevndin til, at 1. mai 2015 verður settur í uppskotið sum evsta mark fyri, at nýggja innfararbannið kemur í gildi.

Sea Shepherd hevur longu boðað frá, at felagsskapurin ætlar sær at koma til Føroyar aftur næsta summar.