36 deyð á nýggjárshaldi í Shanghai

Nýggjárshaldið í miðbýnum í Shanghai í gjárkvøldið endaði við, at 36 fólk lótu lív.

Fólk í túsundatali vóru savnaði á søguliga havnarlagnum vestaru megin Huang-pu ánna, at síggja fýrverkið og bjóða nýggja árinum vælkomnum, tá ein partur av mannamúgvuni knappliga fór at renna og taka upp pengaseðlar, sum vóru blakaðir niður úr einum húsum nærhendis.

Seðlarnir líktust hundrað dollara-seðlum, men talan var kortrini ikki um annað enn virðisleyst pappír.

Fyrstu fólkini, ið tustu avstað, duttu um hvørt annað, og onnur endaðu omaná teimum soleiðis, at fólk komu at liggja undir og vóru traðkaði í hel. 36 doyðu og 47 hava fingið skaða, verður sagt.

Í Shanghai búgva 23 milliónir fólk, og har plagar eitt lasara-show at vera víst í miðbýnum nýggjársaftan, men tað hevur ikki verið gjørt seinatu árini, tí tað hevur ikki borið myndugleikunum til at hava tamarhald á mannamúgvuni.