Krevja skiparan fongslaðan í 26 ár

Ákærin í sakarmálinum ímóti skiparanum á ferðamannaskipinum, Costa Concordiu, krevur fongsulsrevsing í 26 ár. Tað kravið setti hann fram í dag, tá hann tók samanum sakarmálið, sum hevur vart í nakrar dagar.

54 ára gamli skiparin, Francesco Schettino, er ákærdur fyri at hava ábyrgdina av at skipið koppaði 13. januar í 2012, og fyri óviljað manndráp í 32 førum.

SÍ EISINI Verður liggjandi leingi afturat

Skiparin er eisini ákærdur fyri at vera farin av skipinum, hósat hann visti at nógv fólk vóru umborð, og fyri ikki at hava boðað myndugleikunum frá vanlukkuni, tá skipið tók botn.

- Francesco Schettino, skiparin, hevur logið fyri øllum, og hann hevur ongantíð tikið ábyrgdina av tí sum hendir. Tí eigur hann at verða dømdur at sita í 26 ár, segði ákærin.

Skiparin valdi ikki at boða myndugleikunum frá

Undir sakarmálinum hevur skiparin sagt, at hann ikki boðaði myndugleikunum frá, tí hann væntaði at vindurin fór at trýsta skipið nærri landi. Av tí sama byrjaði bjargingararbeiðið seinni enn neyðugt, og skipið koppaði, áðrenn allir bjargingarbátarnir vórðu settir út.

Skiparin hevur eisini sagt, at hann varð tveittur fyri borð, tá skipið koppaði, og at hann síðani varð tikin umborð í ein bjargingarbát. Tað var 13. januar í 2012 at Costa Concordia sigldi á land við italsku oynna, Giglio.

4.229 ferðafólk úr 70 ymiskum londum vóru umborð, tá Costa Concordia koppaði fyri trimum árum síðan. 32 av teimum druknaðu. Væntandi fellur dómur um hálvan februar, skriva italskir miðlar.