Grønland vil selja fisk til Iran

Nú Iran, tey fimm føstu limalondini í ST-trygdarráðnum og Týskland hava gjørt nýggja kjarnorkuavtalu, er líkt til, at altjóða handilstiltøkini móti Iran verða linkað, og tað kann fáa týdning fyri Grønland.

Longu í 2013 bað iranski sendiharrin í Danmark um fund við fólkatingskvinnuna, Doris Jakobsen, um møguleikar fyri samhandli millum Grønland og Iran.

Hamid Bayat, sendiharri, segði, at Iran hevur áhuga fyri at innflyta fisk og at samstarva við Grønland um gransking og tøknifrøðiliga menning.

Mælir til at taka samband uppaftur

Samráðingarnar steðgaðu, men nú ein kjarnorkuavtala er gjørd, mælir Doris Jakobsen grønlendska landsstýrinum til at taka sambandið við Iran uppaftur.

- Tað hevur stóran týdning fyri Grønland, at ein peningasterkur marknaður sjálvur vendir sær til okkara og biður um at sleppa at keypa okkara fisk, sigur Doris Jakobsen.

Doris Jakobsen heitir á landsstýrið um at taka sambandið við iransku myndugleikarnar uppaftur, so Grønland er til reiðar, tá tiltøkini verða sett úr gildi.