Skipari á vanlukkubáti skuldsettur

Skiparin, ið førdi bátin sunnudagin, tá meira enn 800 fólk druknaðu, er nú skuldsettur fyri sín leiklut. Vanlukkan er tann ringasta nakrantíð

Flóttafólk, ið yvirlivdu bátsvanlukkuna sunnudagin, verða førd til Italia. Skiparin og ein av manningini á bátinum, sum førdi flóttafólkini, eru nú skuldsettur fyri óviljað manndráp

Mynd: AP

Bjarni Mohr

21.04.2015 - 13:40

Tunesiski skiparin er, saman við einum manni úr Sýria, nú skuldsettur fyri óviljað manndráp, tá hann førdi flóttafólk ólógliga um hav. Teir báðir vóru millum tey 28 fólkini, ið komu frá vanlukkunu við lívinum.

Myndugleikarnir í Italia siga, at skiparin á vanlukkubátinum kann ábyrgdast fyri skilaleysan sjómansskap, tá báturin holvdist og hundraðtals fólk druknaðu.

Ákærin í Sisilia sigur, at báturin við flóttafólkunum varð árendur stutt áðrenn hann sakk. Ákærin heldur ikki, manningin á bingjuskipinum kann ábyrgdast fyri vanlukkuna.

Ringasta bátsvanlukkan nakrantíð

Vanlukkan sunnudagin, tá báturin við flóttafólkunum holvdist 200 kilometrar sunnanfyri italsku oynna, Lampedusa, er tann ringasta nakrantíð, boðaði UNHCR frá í morgun.

Greinin heldur fram niðanfyri

Saturday’s Mediterranean Sea tragedy is the deadliest on record. 850 people were on board. Only 28 survived. pic.twitter.com/u9ipqgLjml
— UNHCRNews (@RefugeesMedia) April 21, 2015

850 flóttafólk vóru umborð á bátinum ið holvdist og sakk, sigur UNHCR, Flóttafólkahásendiráðið hjá ST. Bert 28 fólk komu livandi frá vanlukkuni sunnudagin.