Frætti um óhapp hjá Teistanun í fjølmiðlunum

Sjóvinnustýrið visti av ongum, fyrr enn tíðindini komu í Kringvarpinum og øðrum miðlum um, at strandfaraskipið Teistin hevði borið við grótkastið í Hesti skírismorgun í fjør.

Sjóvinnustýrið hevur skrivað frágreiðing um hendingina 17.apríl í fjør.

Um fráboðanarskyldu sigur Sjóvinnustýrið, at tá óhapp henda, skulu skiparin ella reiðarin boða Sjóvinnustýrinum frá skjótast til ber. 

Men Sjóvinnustýrið fekk ikki boð um óhappið hjá Teistanum, fyrr enn fjølmiðlar høvdu tíðindini um tað.

Kunnu altíð ringja

Hetta var ein halgidag, skírisdag, men Sjóvinnustýrið hevur eina vakttelefon, sum altíð kann ringjast til, stendur í frágreiðingini. 

Sjóvinnustýrið fekk at vita frá Strandfaraskipum landsins, at ISM trygdarmanualurin hjá Teistanum ella Strandferðsluni hevði einki um fráboðanarskyldu til Sjóvinnustýrið. 

Hetta skuldi broytast, so Sjóvinnustýrið fær boð sum skjótast um óhapp hjá strandfaraskipunum. 

43 fólk við

Fitt av vindi var, 18 m/sek. av útnyrðingi, og harður streymur, tá Teistin á veg inn í havnina í Hesti bar við grótkastið. 

43 ferðafólk vóru við og manningin taldi sjey fólk. Eingin fólkaskaði hendi. Bakborðsskrúva fekk skaða av óhappinum.