Heilsutrygd rindar nú fyri tulk hjá læknanum

Kunngerðin frá 2011 um gjald fyri tulkatænastu í sambandi við læknahjálp er broytt. Nú er orðið deyvatulkur komið í broyttu kunngerðina, sum kom í gildi mikudagin.

Kunngerðin sigur annars, at fólk, sum fáa læknahjálp, hava rætt til tulk, tá læknin heldur tað vera neyðugt at fáa umsett tað, sum sjúklingurin sigur, og tað, sum læknin sigur.

Heilsutrygd rindar fyri tulkatænastuna. Tulkar fáa sambært kunngerðini somu tímaløn sum vikarar í skúlum fáa sambært sáttmála millum Lærarafelagið og Fíggjarmálaráðið.

Tímalønin fyri teknmálstulking verður ásett sambært galdandi avtalu millum Heilsutrygd og Teknmálstulkatænastuna.