Klaksvíkar kommuna størst avlop í fjør

Tá liðugt var at gera árið 2014 upp, høvdu komunurnar samanlagt góðar 67 milliónir í avlopi eftir rakstur, íløgur og rentur

Kommunurnar í Føroyum høvdu avlop í fjør, upplýsir Fíggjarmálaráðið. Størsta avlopið var í Klaksvík, har avlopið var 19,5 milliónir

Høgni Djurhuus

Bjarni Mohr

08.10.2015 - 07:58

Hetta upplýsir Fíggjarmálaráðið. Í 2013 var úrslitið slakar 48 mió. kr. í halli. Men sambært fíggjarætlanunum hjá kommununum fyri 2015 fara tær at hava 77,2 mió. kr. í halli í ár.

Sambært Fíggjarmálaráðnum brúktu tær 30 kommunurnar samanumtikið bara hálvt prosent meira til rakstur í 2014 enn í 2013. Men tær brúktu sjey prosent minni til íløgur.

Tað kostaði 1,1 milliard at reka kommunurnar í Føroyum í fjør. Kommunurnar brúktu 376 milliónir til íløgur. Kommunurnar brúktu 40 milliónir til rentur í 2014.

Ikki allar kommunur høvdu avlop

Við árslok 2014 var nettoskuldin hjá kommununum 467 mió. kr. Ikki allar kommunurnar høvdu tó avlop í fjør. Sambært frágreiðingini hjá Fíggjarmálaráðnum høvdu Tvøroyrar kommuna og Fuglafjarðar kommuna størstu hallini í fjør.

Á Tvøroyri var hallið 11,6 milliónir og í Fuglafirði 11 milliónir krónur. Størstu avlopini vóru í størstu kommununum, í Havn, 14,6 milliónir, og í Klaksvík, 19,5 milliónir.

Í ár fer raksturin hjá kommununum at kosta meira enn í fjør, tí kommunurnar hava nú heimarøkt og eldrarøkt. Tær fáa slakar 400 mió. kr. frá landinum til tann raksturin.