Grunaðu ilt fyri einum ári síðani

Fyri meira enn 10 mánaðum síðani fóru fyrstu alarmklokkurnar at ringja í Bretlandi um trygdina í floghavnini í egyptiska býnum, Sharm el-Sheikh.

Sostatt vóru bretar longu á varðhaldi eitt ár undan hendingini leygardagin, tá eitt flogfar datt niður yvir Sinai hálvoynni, 224 fólk lótu lív.

Ábendingar um at bumba var umborð

Bretskar upplýsingar benda á, at ein bumba umborð á flogfarinum var orsøkin til vanlukkuna. Tað skrivar bretska blaðið The Guardian, og myndugleikar hava váttað upplýsingarnar.

Talskvinna hjá bretska forsætisráðharranum, David Cameron, upplýsir, at í fjør vórðu trygdarserfrøðingar sendir til Sharm el-Sheikh at kanna trygdina í lufthavnini og á frítíðarstøðunum í økinum.

Hon sigur, at egyptar høvdu tikið til eftirtektar nakrar av átalunum frá bretsku serfrøðingunum, men hon vildi tó ikki siga nærri, hvørja átalur ella krøv talan var um.

Bretar vístu á trupulleika

Sambært starvsfólki í egyptisku floghavnini snúið bretsku átalurnar seg um vantandi trygd. Tað er framvegis óvist, hví russiska ferðafólkaflogfarið datt niður eftir at hava verið á flogi í góðar 20 minuttir.

- Trupulleikin var øll skipanin. Bretar vístu tá á, at fólk vórðu ikki kannað nóg væl, at vit skuldu havt gjørt meira. Trygdin kundi verið betri, um vit høvdu havt ein skannara aftrat uttanfyri og at vit høvdu dagført hinar, sigur keldan við The Guardian.

Fleiri lond, teirra millum Bretland, hava givið ábendingar um, at talan er um bumbuspreinging, sum viðhaldsfólk hjá hernaðarliga felagsskapinum, ISIL, skipaðu fyri.

Loyva flúgving aftur

Bretland loyvir nú aftur flogførum sínum at flúgva til Sharm el-Sheikh, eftir at trygdarfyriskipanirnar eru fingnar í rættlag aftur, upplýsir Downing Street nummar 10.

Stjórnin hevur, eftir samráð við loftferðslumyndugleikarnar, avgjørt, at loyva flúgving millum Sharm el-Sheikh og Bretland aftur. Nýggju trygdarreglurnar merkja, at ferðafólk bert mugu taka handviðføri við sær.

Annað viðføri verður flutt við øðrum flogfari, verður sagt. 20.000 bretsk ferðafólk bíða eftir at sleppa heim úr Sharm el-Sheikh, skrivar Reuters.