Sigur seg hava eina hydrogenbumbu

Sambært almennu tíðindastovuni í Norðurkorea, KCNA, hevur Kim Jong-un, tá hann var á vitjan á søguligari hernaðarstøð, tilsipað, at hann hevur vandamikil vápn á goymlu.

Kim Jong-un nevndi, at Norðurkorea longu er eitt valdsmikið kjarnorkuland, sum er tilreiðar at skjóta eina kjarnorkubumbu og eina hydrogenbumbu fyri at verja landsins støðu, skrivar KCNA í dag.

Vandamiklari enn kjarnorkubumbur

Norðurkorea hevur fyrr gjørt royndir við trimum kjarnorkubumbum. Men tað er munandi størri bumbutilfeingi, um landið eisini hevur ment eina hydrogenbumbu.

Hydrogenbumbur eru bygdar á ketureaktión, sum stendst av samanbræðing, fusión, og tað skapar uppaftur ógvisligari spreinging enn kjarnorkuvápn, sum eru bygdar á kloyving, fissión.

Fyrr hevur Noðurkorea sagt seg hava størri og máttmiklari vápn enn kjarnokurvápn, men hetta er helst fyrstu ferð, at Kim Jung-un beinleiðis hevur sipað til hydrogenbumbur.

Serfrøðingar ilt við at trúgva Norðurkorea

Men altjóða samfelagið og serfrøðingar hava fyrr kveistrað burtur uppáhaldið um nýggj og máttmikil vápn og sagt tíðindi at verða óálítandi.

Í september ávaraði Institutt fyri gransking og Altjóða trygd í Washington um, at myndir frá fylgisveinum hava víst nýggjar bygningar nærindis einum kendum norðurkoreiskum kjarnorkuverki.

Tað bendir, sambært felagsskapinum, á, at talan er um nýtt hús, har týðandi nýggir lutir til hydrogenbumbu kunnu verða framleiddir.