Norðurkorea skotið rakett út hóast ávaringar

Trygdarráðið hjá ST er kallað saman til fundar eftir at Norðurkorea sunnunáttina skeyt út eina rakett, ið ber langt

Íbúgvar í høvuðsstaðnum í Norðurkorea, Pyongyang, fylgdu við á stórskíggjum, tá tíðindini, um at landið hevði skotið eina rakett upp í rúmdina sunnumorgunin, bórust í almenna sjónvarpinum

Mynd: AP

Bjarni Mohr

07.02.2016 - 09:34

Ein rakett, ið ber langt, varð sunnunáttina skotin út í rúmdina úr Norðurkorea, skriva útlendskir miðlar sambært tíðindastovuni, Reuters.

Rakettin varð skotin út í rúmdina eftir boðum frá Kim Jong-un, forseta í Norðurkorea, upplýsir almenna sjónvarpið í landinum.

Endamálið við at skjóta rakettina upp er, sambært Norðurkorea, at senda Kwangmyongsong 4-fylgisveinin í umfar kring jørðina.

Heimsins leiðarar fordøma hendingina

Uppskjótingin er ikki fallin í góða jørð hjá fleiri av heimsins leiðarum, ið frammanundan høvdu biðið Norðurkorea um ikki at skjóta rakettina upp.

Hendingin er ágangur, er skoðsmálið úr Hvítu húsunum, meðan forsætisráðharrin í Japan sigur, at hendingin als ikki skal góðtakast.

Hóast Norðurkorea sigur, at ein fylgisveinur var umborð á rakettini, halda eygleiðarar, at rakettin er skálkaskjól í royndini at menna tøkni til onnur, vandamikil vápn.

Trygdarráðið hjá Sameindum tjóðum er kallað saman í dag at umrøða íkomnu støðuna, eftir at Norðurkorea hevur skotið rakettina út.