Úrslitið fór upp um milliardina í fjør

Eftir skatt verður avlopið 810 milliónir krónur, sum er tað besta higartil hjá Bakkafrosti. Tað var 647 milliónir í 2014. Bakkafrost gjørdi íløgur fyri góðar 600 milliónir krónur í fjør.

Størsta íløgan er kryvji- og góðskingarvirkið á Bakka, sum verður liðugt í ár. Ein onnur stór íløga í fjør er smoltstøðin á Viðareiði.

Nettoskuldin hjá Bakkafrosti var 391 milliónir krónur við ársenda 2015. Hon var slakar 160 milliónir minni árið fyri.

SÍ EISINI Bakkafrost framvegis framgongd

Bakkafrost endurfíggjaði bankalánini í desember í fjør, tá nýggj fimm ára lánsavtala varð gjørd. Bakkafrost hevði 890 milliónir krónur í ótroyttum kredittum við ársenda 2015.

Tá var solvensurin hjá Bakkafrosti 66 prosent. Á ársaðalfundinum hjá Bakkafrosti 8. apríl fer nevndin at skjóta upp, at 8,25 krónur verða goldnar út í vinningsbýti fyri hvørt partabræv.

Hetta gevur 403 milliónir krónur í vinningsbýti. 4.300 partaeigarar í 22 londum eru í Bakkafrosti. Størsti parturin, góð 26 prosent, er í Føroyum, 22 prosent eru í Bretlandi og sløk 19 prosent eru í Noregi.