Læknatrotið í Danmark ikki so stórt hóast alt

Akutta læknatrotið í Danmark fer næstan at loysa seg sjálvt næstu 20 árini, sambært eini forsøgn, donsku heilsumyndugleikarnir hava gjørt

Læknatrotið í Danmark loysir seg næstan sjálvt næstu 20 árini sambært forsøgn hjá heilsumyndugleikunum

Heini Gaard

Bjarni Mohr

15.03.2016 - 09:07

Sambært forsøgnini vera 6000 fleiri læknar í 2035 enn í dag. Orsøkirnar eru fleiri. Ein er, at tey læknalesandi eru skjótari liðug við útbúgvingina.

Pensjónsaldurin hjá læknum fer at hækka, og so er tað seinnu árini eydnast at fáa fleiri útlendskar læknar til Danmarkar enn fyrr, skrivar Berlingske.

Brennandi spurningurin, sum tó stendur ósvaraður enn, er um læknatrotið í Føroyum eisini verður ávirkað rætta vegin næstu 20 árini.

Tørvurin framvegis stórur í útjaðaranum

Tað eru tó longu nú ábendingar um, at vaksandi talið av læknum ikki fer at loysa akutta tørvin í útjaðaranum í Danmark. Í sjúkrahúshøpi hoyra Føroyar helst til tann bólkin.

Í Esbjerg, har 70.000 fólk búgva, er læknatørvurin akuttur, eins og hann er í Føroyum, og eingin loysn er at hóma.

Arne Nikolaisen, heilsustjóri í Esbjerg, sigur við Kristiliga Dagblaðið, at flestu læknarnir búseta seg, har teir hava fingið sína útbúgving. Neyðugt er at útbúgva læknar um alt landið, sigur Arne Nikolaisen.