Vøksturin heldur fram við sama lag

Heldur tú, at alsamt fleiri nýggir persónbilar koyra á teimum føroysku vegunum enn fyrr, so hevur tú helst eisini rætt í tí.

Fyrra hálvár 2016 vórðu skrásettir 15,9 prosent fleiri nýggir persónbilar enn sama tíðarskeið í 2015, vísa seinastu tølini hjá Akstovuni.

1.115 nýggir persónbilar vórðu skrásettir fyrra hálvár. Í 2015 var talið 962. Sostatt eru 153 fleiri persónbilar skrásettir fyrra hálvár í ár enn í 2015.

Ikki vøkstur allastaðni

Hóast alsamt fleiri persónbilar verða seldir í Føroyum, so er tó ein ávís minking at hóma onkrastaðni í nýggjastu hagtølunum hjá Akstovuni.

Færri motorsúkklur vórðu skrásettar fyrra hálvár enn í fjør. Minkingin svarar til 14,29 prosent, vísir dagførda yvirlitið.

Tað vórðu eisini færri kampingvognar skrásettir fyrra hálvár enn í fjør. Hinvegin vórðu fleiri kampingbilar skrásettir í Føroyum, sambært Akstovuni.