Nú kann søkjast um filmsstuðul

430.000 krónur skulu nú latast teimum, ið eru áhugað í at framleiða føroyskar filmar. Stuðul varð latin fyrr í ár, og nú skal restin av peninginum fyri 2016 latast.

Filmsstuðulin verður latin til hugskots- og handritsmenning, undanframleiðslu, framleiðslu, eftirframleiðslu og útbreiðslu, sigur Mentamálaráðið.

Stuðulin til film kann verða játtaður til einstaklingar, bólkar ella feløg, sambært Mentamálaráðnum, ið umsitur stuðulspeningin.

Stuðulin hækkaður 800.000

Hóast játtanin til føroyska filmsvinnu í ár er hækkað úr 700.000 krónum upp í 1,5 milliónir krónur, er hetta ikki nóg mikið fyri filmsvinnuna.

- Føroyskur filmur skal hava einar fimm milliónir krónur í stuðli um árið fyri at kunna mennast sum vinnugrein, segði Jákup Veyhe, nevndarformaður í Klippfiski, við útvarpið í vetur.

Føroyska filmsvinnan hevur mælt til at seta á stovn eitt filmshús, ið kann byrta uppundir meiri filmsframleiðslu í Føroyum. Húsið er komið á fíggjarlógina fyri 2017, og um alt gongur sum ætlað, er tað klárt um eitt ár.