Ósamd um lógarbroyting

Danska Almanna- og innanríkismálaráðið vil av lógartøkniligum ávum ikki seta lógarbroytingina, ið loyvir samkyndum at gifta seg borgaraliga, í gildi.

Tað vísa skjøl, sum útvarpið hevur fingið innlit í. Men Heilsu- og innlendismálaráðið góðtekur ikki hesa donsku støðuna.

Málið er viðgjørt í Løgtinginum í fimm mánaðir, sigur Sirið Stenberg, landsstýriskvinna, í brævi til Karen Ellemann, ráðharra, tann 14. september. Ríkisumboðsmaðurin hevur kunnað donsku stjórnina um viðgerðina so hvørt.

Ríkislógartilmælið kann ikki broytast

Tí átti ivin hjá embætisfólkunum í Almanna- og innanríkismálaráðnum at verið fráboðaður fyrr. Nú er ov seint at broyta ríkislógartilmælið.  

Málið er avgreitt og avgjørt í Føroyum. Politiska støðan hjá landsstýrinum er, at tað fer ikki aftur í Løgtingið við málinum, sigur Sirið Stenberg.

Løgmaður staðfesti tann 9. mai ríkislógartilmælið, og Ríkisumboðið fekk tað 11. mai. Danska Almanna- og innanríkismálaráðið hevur ikki svarað enn.