Volkswagen sigur 30.000 úr starvi

Bilverksmiðjan væntar at spara 3,7 milliardir evrur, ella 27,5 milliardir krónur í okkara peningi. Tað váttar Volkswagen sambært fleiri tíðindstovum.

Reuters skrivar, at 23.000 fólk starvsfólk í Týsklandi verða søgd upp, tí Týskland er eitt av londunum, har tað er dýrast at gera bilar.

Peningurin, sum verður spardur, skal í staðin nýtast til at gera el-bilar.

9.000 nýggj arbeiðspláss

Fakfeløgini hava góðtikið skerjingarnar, tí Volkswagen hevur afturfyri lovað at stovna 9.000 arbeiðspláss í Týsklandi at menna og framleiða el-bilar.

Volkswagen er millum heimsins størstu bilframleiðarar. Felagið ger millum annað Volkswagen, Audi og Porsche.

Fyritøkan varð stovnað í 1937, og í fjør starvaðust 610.000 fólk hjá Volkswagen. Verksmiðjan gjørdi til samans 10 milliónir bilar.