Íslendski forsetin: Verið ikki fordómsfull

Í almennari fráboðan í gjár segði Guðni Jóhannesson, at hansara tankar fóru til familju og vinfólk hjá horvnu Birnu Brjánsdóttir og tey, sum hjálpa við at loysa málið.

Samstundis heitti hann á íslendingar um ikki at vera fordómsfullar ella illgrunasamir. Hetta kemur í kjalarvørrinum av, at manningin umborð á einum øðrum grønlendskum skipi, Regina C, hósdagin kendi seg alt annað enn vælkomnan, tá teir gingu í Reykjavík. Millum annað vóru teir bidnir um at fara úr eini kiosk, tá teir vóru har. Hetta var bara ein av fleiri keðiligum tilburðum, grønlendska manningin upplivdi henda dagin.

- Tað skal ikki ganga út yvir teir, at fólk halda, at allir grønlendingar eru soleiðis, sigur reiðarin á Regina C, Svend Christensen, við grønlendska kringvarpið KNR.

Kanningarleiðarin í málinum um horvnu kvinnuna, Grímur Grimsson tekur undir við fráboðanini hjá forsetanum.

- Grønlendska tjóðin ikki er undir illgruna. Grønland er eitt land, sum eru okkara vinir. Teir eru okkara brøður og vit skulu fara væl við teimum, sigur Grímur Grimsson við íslendska kringvarpið RUV.