Búskaparlig kreppa í Venesuela

Eygleiðarar siga seg ikki ivast í, at Venezuela fer á húsagang um stutta tíð.

Búskaparliga støðan í Venezuela versnar dag fyri dag, og nú eigur landið skjótt ongar pengar eftir. Annað árið á rað hevur landið fingið keðiliga heiðurin at hava vánaligastu búskaparligu útlitini í heiminum.

Seinastu tíðina hevur nógvur ófriður verið í landinum, og nú boðar amerikanska sjónvarpsstøðin, CNN, frá, at Venezuela ikki eigur  nakrar pengar.

Sagt verður, at landið hevur umleið 70 milliardir kr. í tøkum peningi, men meginparturin er í gulli, sum ikki er so lætt at selja. 

Tí hevur landið einki trygdarnet, og haraftrat skal landið í ár rinda 41 milliardir kr. í lánum aftur.

Oljan svíkur

Vánaliga gongdin kemur av, at 96 prosent av inntøkunum stava frá olju, og nú oljuprísurin er fallin, fær landið munandi minni inntøkur.

Samstundis er sølan av olju minkað, tí ráð eru ikki til at gera íløgur.

Og tá útlitini eru so vánalig, vil eingin lána landinum pengar.

Í 2011 átti Venezuela 208 milliardir kr. í tøkum peningi, og longu í 2012 var peninganøgdin minkað við 139 milliardum kr.