Norðurkorea: USA ætlaði at myrða okkara leiðara

Amerikanska fregnartænastan, CIA, hevur roynt at drepa norðurkoreanska leiðaran, Kim Jong-Un, við millum annað geislavirknum mati, sigur norðurkoreanska ráðharrastovan fyri landsins trygd.

Í einari skrivligari fráboðan leggur Norðurkorea CIA undir at hava ætlanir at drepa Kim Jong-Un saman við suðurkoreansku fregnartænastuni.

Ætlanin var at drepa norðurkoreanska leiðaran við biokemiskum evnum á einum almennum hátíðarhaldi í Pyongyang, sigur norðurkoreanska ráðharraststovan.

Viðurskiftini spent í løtuni

- Deyðiliga úrslitið hevði víst seg eitt ár eftir, stendur í skrivligu fráboðanini.

Norðurkorea sigur, at CIA og suðurkoreanska fregnartænastan høvdu mutrað ein persón til at fremja álopið.

Viðurskiftini millum USA og Norðurkorea eru sera spent í løtuni, og Norðurkorea sigur, at ætlaða álopið er einki minni enn ein krígsavbjóðing.

Einki verður upplýst, um álopið varð framt, og heldur einki verður sagt um, hvussu Norðurkorea fekk frænir av ætlanini.