Ritualið má broytast

Fólkakirkjan kann ikki signa hjúnabandið hjá samkyndum, sum eru borgaraliga vígd, sama, hvat verður lagt í ritualið, sum kirkjan brúkar, tá borgaraliga vígd hjún verða signað.

Rigmor Dam, landsstýriskvinna, hevur svarað Helga Abrahamsen, løgtingsmanni, sum spurdi, hvat í ritualinum kann forða presti at signa eitt hjúnalag millum til dømis tvær kvinnur.

SÍ EISINI Løgtingsnevnd tekur undir við lógarbroyting

Landsstýriskvinnan sigur, at ikki ber til seinni at lesa ein týdning inn í eina lógaráseting, sum ikki bar til, ella sum var óhugsandi, tá ásetingin varð gjørd.

Ritualið er frá 1938 og tá vóru samkynd hjúnabond ikki til. Skal ritualið brúkast til samkynd eisini, má tað broytast og løggildast av nýggjum.

Galdandi ritual kann ikki brúkast

Rigmor Dam vísir eisini á skriftstøðini, sum eru greið dømi um, at orðalagið í ritualinum er ætlað at signa hjúnalag millum mann og kvinnu einans. 

Harafturat er rætt og slætt ikki loyvt at brúka eitt ritual til annað endamál enn tað, sum tað er løggilt til. 

Tí er útilokað, at prestur kann brúka galdandi ritual til at signa borgarliga stovnað hjúnalag millum eitt nú tvær kvinnur, svarar Rigmor Dam Helga Abrahamsen.