Grótgarður í Skopun er dýrur

Uttasti grótgarðurin í Skopunar havn, á Bergi, sum varð gjørdur í 1990, kostar framvegis landinum pengar, tí grót haðani fer í siglingarrennuna, tá nógv brim er. Neyðugt var at rudda rennuna í 2014 og í 2015 og nú er aftur neyðugt at fáa grót úr siglingarrennuni.

Landsverk hevur fingið tilboð, og arbeiðið kostar 1,8 mió. kr. Landsverk hevur 600.000 kr., so neyðugt er at biðaj um 1,2 mió. kr. í eykajáttan. Hon kann ikki bíða til eftir ólavsøku, so í morgin ári fer Fíggjarnevndin at viðgera fíggjarnevndarskjal frá landsstýrismanninum í samferðslumálum. Arbeiðið í Skopun má gerast á hásumri og tað er nú í juli.

Seinastu árini hevur Landsverk kannað innsiglingina til Skopunar havn á hvørjum ári, og í ár vísir kanningin, sum nýliga varð gjørd, at nógv grót aftur er skolað frá grótkastinum uttan fyri molan á Bergi í innsiglingina.　

Longu nú er ringt hjá Teistanum at brúka havnina, tá veðrið er vánaligt, tá nógvur streymur er, ella stór fjøra.