Søkir eftir stjóra at umsita yvirtikin familjumál

Søkt verður nú eftir fakligum stjóra til Familjufyrisitingina hjá landsstýrinum.

Á ólavsøku í ár verður málsøkið persónsrættur, húsfólkarættur og arvarættur yvirtikið.

Familjumál, sum Ríkisumboðið umsitur, verða flutt til landið og skipað undir Familjufyrisitingini. 

Heilsu- og Innlendismálaráðið, sum lýsir starvið leyst, væntar millum annað, at umsøkjarar eru løgfrøðingar.

Fyrsta uppgávan hjá fakliga stjóranum verður at byggja upp føroysku Familjufyrisitingina og tryggja, at starvsfólkini hjá Ríkisumboðnum verða smidliga flutt til Familjufyrisitingina. 

Ein týðandi uppgáva verður eisini at tryggja eina framhaldandi talgilda og nýmótans umsiting. 

Freistin at søkja starvið sum fakligur stjóri á Familjufyrisitingini er til 7.mars, og stjórin skal byrja 1.apríl.