Keypir ull í summar

Búnaðarstovan fer at taka móti ull í juli og nakað út í august.

Tað sigur Høgni Hoydal, landsstýrismaður, sum hevur svarað einum spurningi frá Jenis av Rana, løgtingsmanni, um møguleikan at sleppa av við ull í ár.

Búnaðarstovan hevur slakar 400.000 kr. til ullarmóttøku í ár.

Høgni Hoydal sigur, at Búnaðarstovan fór á sumri í fjør undir samstarv við Sp/f Navia á Toftum um eina menningarætlan fyri føroysku ullini. 

Fyrsti flokkur 

Hendan menningarætlanin er nú komin so langt, at øll fyrsta floks ullin frá ullarmóttøkuni í 2016 er vorðin virkað til 100 prosent føroyskt tógv.

Sp/f Navia skipar seinni í summar fyri stórum kunningarátaki um tógvið úr hesara fyrsta floks ullini, so marknaðurin hjá  føroysku ullini vónandi batnar, sigur Høgni Hoydal. 

Verri gongst at finna gagnnýtslu fyri ullini, sum er í øðrum flokki, sigur Høgni Hoydal.

Her er brúk fyri serstakari fígging til tekniskar royndir og skjalfesting, sum mugu gerast á royndarstovum uttanlands. 

Búnaðarstovan sigur seg hava brúk fyri 700.000 kr., skal ullarmóttøkan verða vælskipað.