- Tíðindi, mentan og ítróttur
- Landið skal virða sjálvræðið hjá kommunum
![](https://kvf.fo/sites/default/files/styles/grein-ovasta-mynd/public/jogvan_i_skorini_1.png?itok=TPYtQnH2)
Landið skal virða sjálvræðið hjá kommununum. Kommunurnar skulu sjálvar sleppa at gera av, um tær vilja samstarva við onnur um eldraøkið, og hvønn tey vilja samstarva við.
Tað sigur Jógvan í Skorini, borgarstjóri, nú Eiðis kommuna hevur havt býráðsfund um samstarvið innan eldraøkið.
Snýr seg um kommunala sjálvræðið
- Kommunala sjálvræðið skal virðast, og tað skal ikki verða tvungið samstarv. Kommunurnar skulu sjálvar velja, um tær ynskja at samstarva um eldraøkið ella ikki, sigur Jógvan í Skorini.
Men tað merkir ikki, at Eiðis kommuna, sum er partur av VEKS samstarvinum, sum er millum Vestmanna kommunu, Sunda kommunu, Kvívíkar Kommunu og Eiðis kommunu, vil sleppa burturúr samstarvinum.
- Vit hava eitt væl skipað VEKS-samstarv. Tað snýr seg um, at landspolitikarar hava álit á kommunalpolitikarum, og at kommunala sjálvræðið verður virt, sigur Jógvan í Skorini, borgarstjóri á Eiði.
Lógin áleggur kommunum at samstarvast
Lógin um kommunalt samstarv, sum hon nú er orðað, áleggur kommununum at vera í ávísum samstarvi um eldraøkið.
Landsstýrið hevur spurt kommunurnar, hvat tær halda um at broyta lógina um kommunalt samstarv, t.e.lógina um eldraøkið, soleiðis, at eldraøkið verður lagt út til hvørja einstaka kommunu sær, sum so kann velja at umsita økið einasamøll ella saman við øðrum kommunum.
Tá eldraøkið varð lagt út til kommunurnar í 2015, varð sagt, at skipanin skuldi endurskoðast í 2019.
Men hon verður longu endurskoðað í ár.