Bretland givið avboð til saudiska ráðstevnu

Og hann er ikki einsamallur at hava broytt hugsan um luttøku - tað sama hava fíggjarmálaráðharrarnir í Niðurlondum og Fraklandi, eins og fleiri aðrir topppolitikarar og vinnulívsleiðarar.

Grundin er illgrunin um, at Saudiarabia hevur blóð á hondunum í sambandi við horvna saudiarabiska journalistin, sum skrivaði fyri Washington Post. 

Jamal Khashoggi er ikki sæddur, síðani hann fór inn á arabiska konsulátið í Istanbul 2. oktober. 

Turkaland sigur seg hava prógv fyri, at hann varð dripin inni á konsulátinum. 

Og tí er neyvan tað besta hugskotið at fara til Saudiarabia beint nú at tosa um kapital og íløgur, ella sum eitt talsfólk fyri Liam Fox, ráðharra sigur við BBC:

- Hetta er ikki stundin fyri hann at luttaka. Vit í Bretlandi eru enn sera stúrin um, at Jamal Khashoggi er horvin. Tey, sum hava ábyrgdina av hesum, mugu standa til svars fyri tað, sigur ráðgevarin hjá bretska handilsmálaráðharranum.

Tó so, nakrar risastórar altjóða fyritøkur ætla sær framvegis at luttaka á saudisku íløguráðstevnuni, - tildømis Goldman Sachs og Pepsi, skrivar BBC.