Danskar jarðarmøður undirgrava ljósmøðurnar

Klokkan trý í gjár herdi Ljósmøðrafelagið verkfallið, tá øll undantøk vórðu strikað.

Men árinið av herðingini var avmarkað, tí samstundis lendu tvær danskar jarðarmøður á flogvøllinum og fóru beint til arbeiðis á Landssjúkrahúsinum. 

Annika Hoydal, forkvinna í Ljósmøðrafelagnum, harmast støðuna. 

- Vit mugu bara staðfesta, at ein vikarstova í Danmark ikki virðir verkfalsrættin hjá okkum, og hevur funnið tvær ljósmøður, sum ikki eru í nøkrum fakfelag, at koma til Føroya at arbeiða. 

Forkvinnan í Ljósmøðrafelagnum sigur, at felagið annars hevur tryggjað sær stuðul frá bæði tí danska og øðrum norðurlendskum ljósmøðrafeløgum undir verkfallinum. 

- Tað danska ljósmøðrafelagið hevur verið í samband við hesa vikarstovuna og aðrar danskar vikarstovur. Aðrar vikarstovur siga, at tær bróta ikki verkføll, men hendan her hevur so valt øðrvísi.