Yvirtøka samtykt skjótt í løgtinginum

Løgtingið fer skjótt at samtykkja eina yvirtøku.

Uttanlandsnevndin mælir einmælt til at samtykkja uppskotið hjá løgmanni um at yvirtaka málsøkið, sum eitur kort- og landmátingarmyndugleikin.

Tá Fólkaflokkurin hevur lagt sama uppskot fram heilar tríggjar ferður í hesum valskeiðinum, hevur meirilutin í Uttanlandsnevndini annars mælt til at fella málið.

Orsøkin er, sigur samgongan, at hon vil eisini hava myndugleikan at gera sjókort við í yvirtøkuna.

Og tann myndugleikin, at gera sjókort, er við nú.

Ikki í gildi alt fyri eitt

Lógin um yvirtøkuna skal koma í gildi 1.apríl næsta ár, sjókortini tó ikki fyrr enn 1.januar í 2020.

Tveir arbeiðsbólkar við umboðum fyri føroyskar og danskar myndugleikar eru settir at fyrireika yvirtøkuna, ein fyri landkort og ein fyri sjókort. 

Arbeiðssetningurin hjá báðum bólkum er at lýsa, hvussu økini verða fyrisitin í dag, altjóða samstarv, hvussu yvirtøkan ítøkiliga verður framd og framtíðar samstarv millum føroyskar og danskar myndugleikar, eisini altjóða bindingar. 

Sambært tíðarætlanina verða báðar frágreiðingarnar latnar í ár. 

Mett verður, at tað fer at kosta 2,6 mió. kr. at yvirtaka landkortini og 5,6 mió. kr. at yvirtaka sjókortini.