Tríggjar fyritøkur dálka sum alt Svøríki

Tær tríggjar altjóða svensku fyritøkurnar, Hennes & Mauritz, Ericsson og Electrolux hava størri útlát av vakstrarhúsgassi enn alt Svøríki tilsamans.

Dagens Industri skrivar, at útlátið hjá hesum trimum fyritøkunum er 108 milliónir tons av vakstrarhúsgassi árliga. Til samanberingar var utlátið hjá øllum Svøríki gott 100 milliónir tons. 

Uppgerðin fyri Hennez & Mauritz, Ericsson og Electrolux fevnir um teirra framleiðslu og virksemi kring allan heim.

Nakrar fyritøkur gera upp, hvussu nógv útlát av kol-tví-súrni tær hava, men mangar upplýsa púrt einki um sítt útlát, skrivar Dagens Industri.

Ericsson sigur, at útlátstølini hjá Dagens Industri og samanberingin av Ericsson og Svøríki ikki er saklig.

- Tey útlátini, vit gera upp, galda fyri allar vørur í 180 londum. Og allur okkara ídnaður stendur fyri umleið hálvum øðrum prosenti av heimsins samlaða útláti av kol-tvísúrni, skrivar Mats Sharp, sum hevur ábyrgdina av burðardygd hjá Ericsson.