Starvsnevndin í FSF er óbroytt

Starvsnevndin í Fótbóltssambandi Føroya er óbroytt.

Seks mans vóru stillaðir upp til tríggjar sessir á Aðalfundinum hjá FSF, sum var seinnapartin í dag. 

Fróði Danielsen, Jógvan Páll Joensen og Kristmund Johannesen, sum hava sitið í Starvsnendini seinastu fýra árini, stóðu fyri vali. Teir blivu allir afturvaldir. 

Hini valevnini, sum ikki blivu vald vóru Sonni L. Petersen, Steinfinnur Mittelstein og Jákup A. Olsen.

Odmar Selfoss og Jákup A. Olsen eru valdir sum varalimir.

Afturvaldu nevndarlimirnir siga, at teir fara millum annað at arbeiða fyri at fáa fleiri børn og ung at spæla fótbólt, at lyfta dómarastøði og at styrkja umsitingarnar úti í feløgunum.