Sirið skal svara um Novo grunnin og diabetes

Í dag skal Sirið Stenberg, landsstýriskvinna, siga løgtinginum, hvussu er vorðið við málinum um tilboðið frá Novo Nordisk grunninum um diabetessamstarv og at byggja miðstøð fyri diabetes í Føroyum.

Hon skal svara einum skrivligum fyrispurningi frá Kaj Leo Holm Johannesen, løgtingsmanni.

Løgtingið skal eisini atkvøða, um Poul Michelsen, landsstýrismaður, skal svara einum fyrispurningi frá Helga Abrahamsen, løgtingsmanni, um Føroyar sum royndarland fyri 5G netið.

Annars eru ófráboðaðir fyrispurningar frá tingfólki til landsstýrið á skránni fyri tingfundin i dag, sum byrjar klokkan13:30.

Seinasti framløgudagur

Á middegi í dag skal Løgtingsskrivstovan hava tey mál, sum skulu leggjast fram í hesari tingsetuni. Seinasti framløgudagur er um eina viku, hósdagin 7.mars.

Mál, sum skulu viðgerast í tingsetuni, men ikki eru komin løgtingsskrivstovuni í hendi á middegi í dag, mugu hava 17 undirskriftir fyri at verða løgd fram.

Landsstýrið hevur samtykt at leggja fram millum annað nýggja lóg um náttúruvernd, lóg um margfeldni í náttúruni, sum hon kallast. 

Sambært árskalendaranum hjá løgtinginum fer løgtingið í summarfrí fríggjadagin 3. mai.