Danske Bank manglar pengar

Danske Bank er so illa fyri eftir hvíttingargøluna, at partaeigararnir verða noyddir at hækka partapeningin við 50 milliardum krónum, um bankin skal klára seg í eini fíggjarkreppu.

Tað vísa útrokningar sum tveir bankaserfrøðingar hava gjørt, og teir vísa samstundis á, at um partapeningurin ikki verður hækkaður, so kann ein møgulig rokning, um bankin kemur í kreppu, enda hjá statinum, ella hjá partaeigarunum, har nógv tann størsti er A.P. Møller Holding.

Tað eru bankaserfrøðingarnir, Johannes Raaballe og Anders Grosen, sum starvast á universitetinum í Aarhus, sum hava gjørt kanningina. Teir siga bart út, at Danske Bank er ikki betri fyri nú, enn hann var tá fíggjarkreppan tók seg upp í 2008, skrivar Berlingske Business.

Stórar avleiðingar fyri statin

Bankaserfrøðingarnir siga eisini, at um bankin kemur í kreppu, so fær tað stórar avleiðingar fyri statin, og tí mæla teir til at hækka partapeningin sum skjótast.

Teirra frágreiðing kemur óvart á, tí bæði Tjóðbankin og Fíggjareftirlitið hava sagt, at bankarnir eru munandi betri fyri, enn undan fíggjarkreppuni í 2008.

Fíggjarleiðarin í Danske Bank, Christian Baltzer, sigur seg ikki vera samdan í frágreiðingini, tí ein meting í november í fjør vísti, at bankin klárar stóra búskaparliga afturgongd.